Algúns dos temas aquí recollidos foron versionados posteriormente en sucesivos discos, como explicou o propio Suso en certa ocasión:

No 74, nunha viaxe a Barcelona, gravei unha cinta clandestina que se chamou 'Loitando', que distribuín eu mesmo, que me deu moitas ledicias e da que hoxe neste disco recupero algunhas cantigas para que deixen definitivamente de ser clandestinas.

Aínda que Suso fala do ano 1974, a gravación tivo que ser posterior a setembro de 1975, data das últimas execucións franquistas ás que se alude no final da letra de Compañeiros. O disco ao que se refire pode ser Regodobargo ou As palabras dos galegos.